Изборната кампања влегува во својата последна фаза. Остануваат уште седум дена до предизборниот молк пред гласањето кое ќе се одржи на 19 октомври. Активностите на партиите продолжуваат и денес.
Коалицијата предводена од ВМРО-ДПМНЕ денес ќе биде во јужниот дел на земјата со митинзи и средби со граѓани во Дојран, Валандово, Богданци и Гевгелија, додека кандидатот за градоначалник на Скопје, Орце Ѓорѓиевски, ќе одржи прес-конференција.
Опозициската СДСМ денес ќе ги посети неколку скопски општини и општината Брвеница во Тетово. Караванот на СДСМ ќе биде во Сопиште, Ѓорче Петров и Гази Баба, а кандидатката за градоначалник на Скопје, Каја Шукова, ќе даде изјава за медиумите.
Во Битола, денес активности ќе има политичката партија Левица, каде што е најавено присуство на лидерот на партијата Димитар Апасиев и кандидатката за градоначалник на Струга, Јована Мојсовска.
Прес-конференции денес ќе одржат и Движењето за слободни и независни и потпретседателот на ДУИ Арбер Адеми, заедно со кандидатот за градоначалник на Липково, Еркан Арифи.
