Komisioni për Mbrojtjen e Konkurrencës ka nisur procedurë për të hetuar nëse është dhënë në mënyrë të paligjshme ndihmë shtetërore përmes Programit për investime në mjedis për vitin 2025, në kohën kur ministër i atëhershëm ishte Izet Mexhiti.
Procedura pason pasi Komisioni, gjatë shqyrtimit të dokumentacionit, ka konstatuar indikacione se disa nga masat mund të jenë realizuar përmes shpërndarjes së mjeteve pa pasur më parë një vendim të miratuar nga vetë Komisioni.
Komisioni njoftoi se procedura është iniciuar në bazë të të dhënave dhe njohurive të siguruara gjatë ushtrimit të kompetencave ligjore për kontrollin dhe mbikëqyrjen e ndihmës shtetërore.
„Gjatë shqyrtimit të dokumentacionit të dorëzuar nga Ministria e Mjedisit dhe Planifikimit Hapësinor në lidhje me Programin për investime në mjedis për vitin 2026, Komisioni konstatoi rrethana që tregojnë nevojën për shqyrtim të mëtejshëm të realizimit të masave të përfshira në Programin për vitin 2025. Duke pasur parasysh këto të dhëna, si dhe nenin 18 të Ligjit për kontrollin e ndihmës shtetërore, Komisioni miratoi Konkluzionin për fillimin e procedurës për vlerësimin e ndihmës së mundshme të paligjshme shtetërore dhe nisi mbledhjen e të dhënave dhe dokumentacionit përkatës“, thuhet në njoftimin e institucionit.
Më konkretisht, Komisioni thekson se Ministria e Mjedisit dhe Planifikimit Hapësinor gjatë vitit 2025 kishte dorëzuar njoftim për planifikimin e dhënies së ndihmës shtetërore.
Megjithatë, gjatë procedurës së shqyrtimit paraprak, ministria nuk kishte dorëzuar informacionet dhe sqarimet shtesë të kërkuara. Për këtë arsye, Komisioni ka konsideruar se njoftimi është tërhequr dhe, rrjedhimisht, nuk kishte marrë fare vendim për lejueshmërinë e masave të ndihmës shtetërore.
Sipas Komisionit, nga Programi për vitin 2026 rezultojnë indikacione se projektet dhe aktivitetet e miratuara në kuadër të Programit për vitin 2025 janë realizuar, përkatësisht se janë shpërndarë mjete për zbatimin e tyre.
„Duke pasur parasysh se për masat në fjalë Komisioni për Mbrojtjen e Konkurrencës nuk kishte miratuar vendim, ekzistojnë dyshime serioze se mund të jetë dhënë ndihmë shtetërore në kundërshtim me nenin 13 të Ligjit për kontrollin e ndihmës shtetërore, përkatësisht se mund të bëhet fjalë për ndihmë shtetërore të paligjshme“, deklaruan nga institucioni.
Procedura është ende në zhvillim dhe deri tani nuk është marrë asnjë përfundim përfundimtar, as nëse bëhet fjalë për ndihmë shtetërore dhe as nëse ajo është dhënë në mënyrë të paligjshme. Në këtë fazë nuk dihet as shuma e saktë e mjeteve, e as numri i përfituesve, pasi këto të dhëna duhet të përcaktohen pas marrjes dhe analizimit të dokumentacionit të kërkuar.
Ministria e Mjedisit tashmë e ka pranuar konkluzionin e Komisionit dhe është në proces të sigurimit të informacioneve dhe dokumentacionit të kërkuar, të cilat duhet të dorëzohen deri më 10 korrik.
„Sa i përket pretendimeve të përfshira në përmbledhjen e Komisionit, Ministria mbetet e përkushtuar për bashkëpunim të plotë me Komisionin dhe për sigurimin e të gjitha informacioneve të nevojshme për përcaktimin e saktë të gjendjes faktike“, deklaruan nga ministria.
Nga atje informojnë se gjatë vitit 2025, përmes këtij programi janë ndarë gjithsej rreth 29 milionë denarë. Prej tyre, 1.65 milionë denarë u janë ndarë shtatë kompanive – personave juridikë, në shuma individuale nga 100.000 deri në 400.000 denarë, ndërsa pjesa tjetër e mjeteve u është ndarë shoqatave.
Autor: Petar Klinçarski
