Ish-drejtori i Shërbimit për Punë të Përgjithshme dhe të Përbashkëta të Qeverisë, Pece Mirçevski, ndodhet në paraburgim, ndërsa faktet e reja zbulojnë abuzime të shumta me fondet shtetërore. Ai ka punësuar ekipin e tij të ngushtë dhe ka organizuar udhëtime luksoze me paratë e qytetarëve.
Në një vizitë në Dubai, Mirçevski mori me vete dy bashkëpunëtorë: një nga sektori i ushqimit dhe një nga instalimet mekanike, duke ngritur dyshime mbi qëllimin e vërtetë të udhëtimit. Një skemë e ngjashme u përsërit edhe gjatë një udhëtimi në Sofje, ku disa nga punonjësit u prezantuan madje si gazetarë.
Përveç shpërdorimit të fondeve, dokumentet tregojnë se disa prej tyre kanë marrë shtesa prej 30% në pagë për “punë specifike dhe zmadhim të intensitetit të punës”. Ironikisht, disa nga të përfshirët janë shqiptarë, megjithëse përfaqësimi i shqiptarëve në këtë institucion mbetet i ulët – vetëm 24 nga 348 të punësuar.
Afera e Mirçevskit tregon se si burimet shtetërore shfrytëzohen për interesa personale, duke lënë pas një institucion të mbushur me punësime të dyshimta dhe keqpërdorime financiare.
