Директорот на МЕПСО, Бурим Латифи, денеска избра да организира брифинг со новинари за темите и скандалите за кои прв известуваше ПорталиХ, но без да го покани медиумот што ги отвори овие прашања пред јавноста.
Ова отвора неколку легитимни јавни прашања:
— Дали директорот Латифи се плаши од директните прашања на ПорталиХ?
— Зошто медиумот што објави документи, тендери, законски сомнежи и проблематични врски е исклучен од брифингот?
— Дали се организираат брифинзи само со „подобни“ медиуми, каде што нема непријатни прашања?
— Зошто МЕПСО сѐ уште нема дадено конкретен одговор дали е применет член 110 од Законот за јавни набавки за понудата која била 71,7% пониска во тендерот за чистење на коридорите под далноводите?
— Дали била побарана финансиска анализа и математички докази како компанијата „Грин Меинтененс“ може да ги реализира работите со толку драстично пониска цена?
— Зошто МЕПСО не даде јасни одговори во врска со фактот дека ПорталиХ не успеа физички да го лоцира седиштето на италијанската филијала во Глумово?
— Дали некој ќе понесе одговорност за фактот што Северна Македонија ризикува да плати околу 6 милиони евра по раскинувањето на договорот со „Енергоинвест“?
— Дали МЕПСО направил длабинска репутациска и безбедносна анализа за компаниите избрани за стратешкиот проект за 400 kV интерконекција со Албанија, имајќи ги предвид врските и сомнежите објавени во регионалните медиуми?
ПорталиХ не бара привилегии. Но исклучувањето на медиумот што ги објави аферите од брифинг токму за тие теми е лоша порака за јавната транспарентност и односот на институциите кон критичките медиуми.
