Адем Чучул, генералниот секретар на Државната комисија за спречување на корупцијата, се наметнува како главен фаворит за раководење со институцијата, откако освои 96,50 поени на ранг-листата на собраниската Комисија за селекција. Иако конечната одлука сè уште i припаѓа на Комисијата за избори и именувања и потоа на пратениците, неговата убедлива предност практично го доближува до функцијата нов претседател на ДКСК.
Чучул е дипломиран правник од Скопје и речиси 19 години работи во Антикорупциска. Во постарите документи се појавува како „советник за спречување на корупцијата во политиката“, додека во поновите документи и на официјалната веб-страница на институцијата е наведен како генерален секретар и прва контакт-точка за медиумите. Неговата кариера, која се движела од експертска до раководна позиција, го позиционира како длабок познавач на внатрешните механизми на институцијата.
За време на интервјуто пред Комисијата за селекција, тој изјавил дека Антикорупциската ја чувствува како „свој дом“ и дека соработувал со речиси сите состави на Комисијата низ годините.
Комисијата за селекција даде претежно позитивни оценки за него: значајно искуство во спречување на корупцијата и судир на интереси, јасна визија и конкретен план за развој на институцијата, како и одлични одговори на сите општи и специфични прашања. Со ова, тој ги надмина во конкуренција останатите девет кандидати, меѓу кои ревизорот Бранко Смилевски и професорот Кимо Чавдар.
Во јавните документи и настапи, Чучул најчесто се поврзува со превентивните политики, регистрите на функционерите, контролата на имотната состојба и идејата за обезбедување специјализиран софтвер што државата сè уште не го финансира систематски. На меѓународен план, тој се појавува како обучувач на тренинзи за корупција и судир на интереси, како дел од делегации на средби со амбасадори и странски организации, како и како домаќин на работни состаноци со меѓународни партнери.
Формалната процедура продолжува – Комисијата за избори и именувања треба да избере еден кандидат и да го предложи пред Собранието, кое ќе ја донесе конечната одлука. Но доколку не се случи политички пресврт, Адем Чучул – човекот што ја нарекува Антикорупциската „свој дом“ – има големи шанси да премине од заднината во првиот ред, како нов претседател што ќе ја води институцијата задолжена за заштита на државата од корупција и судир на интереси.
