По објавувањето на повикот за државни ваучери во вредност од 15.300 денари за набавка на електронска опрема, социјалните мрежи се преплавени со објави во кои студентите нудат да ги продадат добиените ваучери – најчесто по пониска цена од реалната.
Иако мерката е наменета за купување лаптоп, компјутер или таблет, дел од студентите се обидуваат да профитираат на поинаков начин.
Министерката за образование и наука, Весна Јаневска, изјави дека проектот бил предизборно ветување кое Владата го исполнила, но институциите не можат да ги спречат поединците да ги злоупотребуваат ваучерите.
„Има снаодливи студенти кои на различни начини се обидуваат да си го олеснат животот. Ние не можеме да се занимаваме со тоа. Зависи од нивната совест што ќе прават со ваучерите“, рече Јаневска на еден настан.
Таа потсети дека 55.000 студенти ќе добијат ваучери, а апликациите преку порталот uslugi.gov.mk се отворени до 20 декември 2025 година.
