Уште еден потресен случај на насилство меѓу малолетници кружи на социјалните мрежи. Неколку адолесценти, најмалку пет години постари од жртвата, нападнале 13-годишно дете во Драчево – само за едно видео што ќе им донесело кликови, лајкови и „слава“ на интернет.
Според новинарот Фуркан Салиу од PortaliX, напаѓачите знаеле дека детето тренира кикбокс, но наместо да ја избегнат пресметката, тие ја виделе како предизвик. „Отишле со идеја да претепаат боксер и да го објават видеото за сите да го видат и да се смеат“, раскажува таткото на детето, Рафис Камберовски, за PortaliX.
Тој вели дека неговиот син тренира кикбокс веќе шест години и дека по објавувањето на видеото добил реакции и од други родители, кои му кажале дека истата група одамна го имала на мета. Откако ја видел снимката, Камберовски веднаш го пријавил случајот во полиција. „Го пријавив во полиција, од таму ми рекоа дека брзо ќе го процесираат случајот“, вели тој.
Ова не бил прв инцидент. Таткото објаснува дека истата група адолесценти, на возраст од 15–16 години, претходно дошле и во училиштето на неговиот син за да го нападнат, но биле спречени од постари ученици кои ги избркале.
Случајот од Драчево е само уште еден пример за феномен што забрзано расте: насилство што се снима и се споделува онлајн како форма на забава и мерка на „его“ меѓу младите.
PortaliX само во претпоследниот месец објави две слични стории, каде училишното насилство беше главна тема. Иако феноменот станува алармантен, досега нема никаков сериозен институционален одговор. Секторот за компјутерски криминал нема покренато видливи истраги за објавените случаи, а училиштата немаат преземено иницијативи за воспоставување механизми за заштита и превенција.
