Министерот за внатрешни работи, Панче Тошковски, за време на посетата во Охрид и Струга потврди дека се работи на воспоставување заедничка гранична точка со Албанија кај Ќафасан. Според него, ова ќе биде трајно решение за олеснување на движењето на патници и возила, особено во летните месеци кога сообраќајот е најгуст.
„Со колегите од Албанија работиме на моделот ‘One Stop’. Во комбинација со инфраструктурни подобрувања, тој ќе овозможи избегнување на долги редици и побрзо поминување низ граница“, истакна Тошковски.
Овој проект е дел од поширок план за заеднички гранични премини. На 28 мај министерот најави слични иницијативи и со Србија и Албанија, а на 4 јули веќе беше пуштена во употреба заедничката гранична точка Табановце–Прешево на северната граница.
Во април годинава беше реализиран и уште еден сличен чекор: Косово и Северна Македонија го инаугурираа заедничкиот премин Хан ел Елез–Блаце, на кој присуствуваа премиерите Албин Курти и Христијан Мицкоски. Мицкоски изјави дека преминот, кој со години се сметаше за пречка, сега станува мост на соработка и олеснување на меѓусебните врски.
