Основното јавно обвинителство Штип поднесе обвинение против суспендираниот шеф на Вишото јавно обвинителство Скопје, Мустафа Хајрулахи, за пет кривични дела „малтертирање при вршење на службата“ и за „злоупотреба на службената положба и овластувања“.
Според обвинението, Хајрулахи во периодот септември 2023 – октомври 2024 вршел психолошко насилство врз пет вработени жени, заканувајќи им се со отпуштање од работа, дисциплински мерки и ги принудувал да потпишуваат писмени изјави. Некои од оштетените се разболеле поради стресот.
Обвинителството обезбедило докази и против друг јавен обвинител од Вишото јавно обвинителство за злоупотреба на службената положба, додека постапката се води со цел заштита на жртвите.
Комисијата за дисциплинска одговорност при Советот на јавни обвинители во јуни оваа година констатираше дека Хајрулахи и друг јавен обвинител сториле сериозни професионални повреди. По неговото суспендирање, Хајрулахи најави жалба до Советот на јавни обвинители, тврдејќи дека целата постапка е поврзана со случајот за бонусите во поранешното Специјално јавно обвинителство./PortaliX
