Ниту загриженоста за институционалната дискриминација, ниту застапеноста на Албанците во државните институции, па дури ниту тврдењата за ограничување на употребата на албанскиот јазик, се чини, не се доволна причина ВЛЕН и ДУИ да седнат на заедничка маса.
Двата најголеми албански политички блока продолжуваат меѓусебно да се обвинуваат за настанатата состојба, додека можноста за соработка надвор од партиските разлики останува далечна.
ПорталиХ ги праша лидерите на двата политички субјекта дали се подготвени да седнат на заедничка маса за да разгледаат политички и институционални механизми со кои би се ставил крај на деградацијата и дискриминацијата на Албанците во државните институции.
Одговорите на Али Ахмети и Билал Касами, сепак, не оставаат многу простор за оптимизам.
Лидерот на ДУИ, Али Ахмети, не гледа причина за соработка со претставниците на актуелната власт. За него, единственото решение се предвремените парламентарни избори.
„Нема логика да седнеме на иста маса со луѓето што ја доведоа состојбата до ова ниво.
Предвремените избори се единственото решение и единствениот начин да се запре ова понижување и деградација на кои се изложени Албанците.
Не можеме повеќе да дозволиме политички партии без легитимитет од Албанците да ги претставуваат нивните интереси во извршната власт“, изјави Ахмети за ПорталиХ.
Од друга страна, Билал Касами од ВЛЕН има поинаков поглед на ситуацијата. Според него, повиците за обединување на албанскиот политички фактор се појавуваат секогаш кога ДУИ се соочува со политички тешкотии.
„Симптоматично е што ваквите иницијативи за ‘обединување и соработка’ секогаш излегуваат на површина кога ДУИ и Али Ахмети се во тесно. Последниот пат кога албанскиот политички фактор седна на заедничка маса беше во периодот кога ДУИ изгуби половина од своето гласачко тело и падна на 10 пратеници. Слична е ситуацијата и денес.
Ние сме секогаш за дијалог, особено кога станува збор за интересите на Албанците, но деструктивните политики на ДУИ не оставаат простор за тоа. Дури и денес, ДУИ го блокира Законот за правична и соодветна застапеност, кој произлегува од Охридскиот договор, само за да го попречува ВЛЕН поради политички инаети. Можеби ова е шансата ДУИ, со гласање за овој закон, да докаже дека навистина ги има предвид интересите на Албанците“, изјави Касами за ПорталиХ.
Тој признава дека етничката дискриминација и понатаму претставува проблем, но инсистира дека ВЛЕН активно работи на нејзино сузбивање.
„Што се однесува до етничката дискриминација, тоа е прашање против кое се бориме секојдневно и активно. За жал, сè уште постојат елементи кои не можат да ја прифатат уставната и општествената реалност во земјата и оваа борба ќе продолжи“, додаде Касами.
ПорталиХ за ова прашање го контактираше и Изет Меџити, но тој не одговори на нашето прашање.
Политичките препукувања, во меѓувреме, се случуваат во период кога расте загриженоста за положбата на Албанците во државните институции.
Од Министерството за внатрешни работи и Армијата, па сè до здравството, безбедносните служби и јавните претпријатија, се отвораат прашања за застапеноста на Албанците при вработувањата, на раководните позиции и во процесите на донесување одлуки.
Во последно време се појавија и тврдења за забрана на комуникација на албански јазик во институциите, вклучително и пријавен случај во Институтот за јавно здравје. Овие тврдења допрва треба да бидат проверени од надлежните институции.
Но, додека загриженоста за застапеноста и правата на Албанците бара институционални одговори, судирот меѓу ВЛЕН и ДУИ и понатаму се сведува на политички легитимитет и меѓусебно префрлање на одговорноста.
Ахмети одбива да седне со оние што ги смета за одговорни за деградацијата на положбата на Албанците. Касами, пак, бара ДУИ да ја докаже својата посветеност на интересите на Албанците со гласање за Законот за правична и соодветна застапеност.
Значи, едната страна бара избори за да ја отстрани другата од власта, додека другата бара гласови од опозицијата како доказ за подготвеност за соработка.
Дотогаш, можноста за заеднички албански политички фронт останува заложник на ривалството меѓу двата блока.
И додека ВЛЕН и ДУИ не успеваат да најдат заеднички јазик дури ни за прашања што и двете страни ги сметаат за важни за Албанците, останува отворено прашањето кој и на кој начин ќе одговори на загриженоста за дискриминацијата и нивната застапеност во државните институции.
ПорталиХ
