Shifrat e para nga sistemi “Safe City” kanë dalë dhe ato tregojnë një situatë të rëndë të disiplinës rrugore në Shkup. Brenda vetëm 24 orëve të para të funksionimit, kamerat e sistemit kanë regjistruar 110,000 shkelje, mes tyre 5,000 kalime me të kuqe, ndërsa 90% e të gjitha shkeljeve lidhen me tejkalimin e shpejtësisë.
Këto të dhëna po shërbejnë si bazë për fazën testuese të muajit dhjetor, ndërsa gjobat zyrtarisht do të fillojnë të shqiptohen nga 1 janari 2026. Deri atëherë, shoferët do të marrin vetëm njoftime paralajmëruese.
Ministri i Punëve të Brendshme, Pançe Toshkovski, tha se sistemi sapo është aktivuar dhe rezultatet janë indikative për gjendjen reale në rrugë:
“110,000 shkelje në Shkup janë regjistruar në 24 orë, 5,000 shkelje për kalim me të kuqe, dhe 90% e shkeljeve janë tejkalim shpejtësie. ‘Safe City’ nuk është perfekt, sigurisht do të ketë disa elementë që do të duhet t’i përmirësojmë. Jemi të hapur të veprojmë drejt përmirësimit të sistemit,” deklaroi ai.
Toshkovski shtoi se ende nuk është vendosur se sa do të jetë toleranca e shpejtësisë:
“Ka vende në Evropë ku nuk ka tolerancë fare, ka vende ku toleranca është 10% mbi shpejtësinë e lejuar. Do të diskutojmë në periudhën e ardhshme dhe do të vendosim.”
Edhe automjetet e huaja janë përfshirë në sistem, pa asnjë përjashtim. Ministri shpjegon mekanizmin e ndëshkimit:
“As automjetet e huaja nuk do të përjashtohen nga regjistrimi i shkeljeve. Automjetet e huaja nuk mund të ndalohen të dalin nga Maqedonia, por do të informohen se nuk do të mund të hyjnë përsëri në Maqedoni nëse nuk e paguajnë gjobën.”
Ai konfirmoi gjithashtu se sistemi ka regjistruar shkelje edhe nga funksionarë të lartë qeveritarë:
“Në periudhën e fundit janë gjobitur së paku tre ministra… edhe ne përdorim automjete private dhe besoni se as ne nuk do të lihemi pa përgjegjësi.”
Muaji dhjetor mbetet faza e paralajmërimeve, ndërsa janari do të tregojë se sa efektiv do të jetë “Safe City” në uljen e shkeljeve dhe ndryshimin e sjelljes në trafik.
