Prokuroria Themelore Publike në Shkup ka hapur hetim ndaj katër personave dhe një subjekti juridik për veprën penale rrezikim i mjedisit jetësor dhe natyrës me mbeturina, sipas nenit 230 të Kodit Penal.
Sipas Prokurorisë, i dyshuari kryesor, edhe pse nuk figuron zyrtarisht si menaxher i kompanisë ku magazinohej në mënyrë të paligjshme mbeturina, në praktikë e ka udhëhequr biznesin dhe ka organizuar punën. Në hetim janë përfshirë edhe vajza e tij, e cila ka qenë formalisht udhëheqëse, si dhe dy persona të tjerë që kanë ndihmuar në magazinimin dhe përpunimin e mbetjeve elektronike e elektrike, baterive dhe tonerve të cilësuara si mbetje të rrezikshme.
“Mbetjet ishin grumbulluar në një parcelë në Trubarevë, duke shkaktuar ndotje të tokës dhe ajrit, si dhe rrezik për shëndetin e qytetarëve. Situata u përkeqësua më 13 shtator, kur objekti me mbeturina të paligjshme u përfshi nga flakët. Zjarri i madh çliroi sasi të mëdha gazi, tymi dhe hiri në ajër, ndërsa matjet konfirmuan ndotje të lartë”, thanë nga Prokuroria.
Për shkak të rrezikut, Prokuroria ka kërkuar masën e paraburgimit për të dyshuarin kryesor, ndërsa për tre të tjerët është propozuar arrest shtëpiak. Hetimet po vazhdojnë edhe ndaj personave të tjerë të mundshëm të përfshirë.
