Учениците или без учебници, или со искинати! Родителите упатија жестоки обвинувања кон МОН (ВИДЕО)

Родителите на учениците во основните училишта масовно се жалат на недостаток или искинати учебници. Учениците од четврто одделение во ООУ „Панајот Ѓиновски“ во Бутел останаа без учебници, а малкуте примероци што пристигнале се во распадната состојба.

Родителите, обраќајќи се до PortaliX, велат дека ова е тешка неправда кон децата и директно го обвинуваат Министерството за образование и наука (МОН).

„Јас сум родител на ученик од четврто одделение. Учебниците што им ги дале на децата се искинати, исцртани, некои без страници, а најважно – бројот не е доволен. Во одделение со 30 ученици, учебниците не стигнуваат ниту за половина. Во 2025 година, нашите деца се принудени да учат од купишта хартиени остатоци. Ова е срам и неправда,“ изјави еден родител за PortaliX, споделувајќи и фотографии како доказ.

Во друго реагирање, друг родител ја искажал својата незадоволност со уште поостри зборови: „Да не се осмели некој професор да бара учење од децата, зашто вие сте тие што треба да бојкотирате за овие учебници и конечно да го кренете гласот, а не да се однесувате како сè да е во ред.“

Тој сподели и видео на кое се гледа состојбата на уништените учебници.

Родителите нагласуваат дека ова не е првпат да се соочуваат со ваков проблем, потсетувајќи дека истата ситуација се повторува секоја година. Тие ги критикуваат институциите за недостаток на одговорност и предупредуваат дека наставниот процес не може нормално да се одвива без нови и зачувани учебници.

Во меѓувреме, социјалните мрежи се преплавени со бројни жалби од родители низ целата држава, кои објавуваат фотографии и видеа од оштетени учебници, оценувајќи го ова како еден од најголемите неуспеси на образовните власти./PortaliX