Lotaria Shtetërore në shkurt të vitit 2026 i ka paguar 1.850.610 denarë kompanisë „STARDАST DOOEL“, vetëm dy muaj para se ajo të përzgjidhej përmes tenderit për organizimin e manifestimit me rastin e shënimit të 35-vjetorit të pavarësisë.
Si themeluese e kompanisë figuron Mia Miloshevska, vajza e Boban Miloshevskit, pronarit të produksionit „Avalon“. Kompania e Miloshevskës është gjendur në listën e kompanive që kanë përfituar mjete nga buxheti përmes donacioneve dhe sponsorizimeve të Lotarisë Shtetërore.
Portalix e kontaktoi Miloshevskën për ta pyetur se mbi çfarë baze i kishte përfituar këto mjete. Ajo fillimisht tha se nuk ishte e informuar se për çfarë bëhej fjalë dhe se përgjigjen do ta dërgonte me shkrim.
Megjithëse kanë kaluar dy muaj e gjysmë nga publikimi i materialit me listën e kompanive që kanë përfituar mjete përmes sponsorizimeve dhe donacioneve të Lotarisë Shtetërore, ajo nuk u përgjigj asnjëherë.
Në serinë e shkrimeve për sponsorizimet dhe donacionet e Lotarisë Shtetërore, Portalix raportoi edhe për përzgjedhjen e produksionit „Avalon“, përmes procedurës së tenderit, për organizimin e programit me rastin e shënimit të 35-vjetorit të pavarësisë.
Se sa mjete shtesë i janë paguar kompanisë së Miloshevskës për organizimin e programit për manifestimin e 35-vjetorit, Qeveria e mban të fshehur.
Por përgjigjen për këtë pyetje nuk e dinte as babai i pronares së „STARDАST“, Boban Miloshevski, i cili së fundmi u paraqit në një konferencë për media dhe pyetjen për paratë e cilësoi si provokim.
Përgjigjen e pyetjes që të gjitha mediat e kanë parashtruar prej muajsh, megjithatë, duket se e di vetëm kryeministri Hristijan Mickoski. Ai sot, në një deklaratë për media, tha se organizimi i programit ishte bërë nga kompani shoqërisht të përgjegjshme, pa asnjë kompensim.
„Për të gjithë ata që shpifën dhe shpërndanë informacione të rreme kam një lajm të keq: Të gjitha këto ngjarje Buxhetit dhe qytetarëve u kushtojnë zero denarë. Lirisht mund të kontrolloni te ‘Financat e Hapura’ dhe do të shihni se e gjithë kjo është zero denarë. Gjithçka është organizuar nga kompani shoqërisht të përgjegjshme, kështu që më vjen keq që tek disa individë funksionon Frojdi, të cilët mendojnë se, ashtu siç kanë punuar ata, punon edhe dikush tjetër. Kjo Qeveri është e përgjegjshme dhe promacedonase, e cila kujdeset për qytetarët“, deklaroi sot Mickoski nga Shtipi, por nuk tregoi se cilat kompani i kanë siguruar mjetet dhe sa kanë qenë ato.
Nga informacionet e disponueshme publikisht mund të shihet se Miloshevska e ka themeluar kompaninë „STARDАST DOOEL SHKUP“ në vitin 2021. Të dhënat tregojnë se kompania gjatë një periudhe ka pasur edhe llogarinë e bllokuar, ndërsa bllokimi i fundit i regjistruar ka qenë në mars të vitit 2025.
Pavarësisht kësaj, në vitin 2025 „STARDАST“ ka shënuar rritje të konsiderueshme, me të hyra prej rreth 67 milionë denarësh.
Portalix para dy muajsh publikoi një listë të gjatë të kompanive dhe organizatave që kanë përfituar miliona denarë nga buxheti i Lotarisë Shtetërore përmes donacioneve dhe sponsorizimeve. Mes përfituesve të këtyre mjeteve u shfaqën persona të lidhur me VMRO-DPMNE-në dhe VLEN-in në pushtet, këngëtarë të njohur, institucione private shëndetësore dhe agjenci marketingu.
Por, kur i pyetëm se për çfarë i kishin marrë konkretisht mjetet dhe çfarë kishin bërë me to, shumica refuzuan të përgjigjen. Për një pjesë të konsiderueshme të pagesave nuk arritëm të gjejmë dëshmi për aktivitete konkrete të realizuara në terren. Kështu, mbetet e hapur pyetja se ku kanë përfunduar miliona denarë të Lotarisë dhe mbi bazën e cilave kritere janë ndarë.
Pagesat nuk janë të qasshme dhe nuk mund të gjenden në platformën „Financat e Hapura“, pasi bëhet fjalë për marrëveshje të lidhura drejtpërdrejt ndërmjet Lotarisë Shtetërore dhe kompanive.
