“Po i lutemi Fondit për paratë tona”, thotë Rosana Milovanovik nga Strumica, e cila prej muajsh po përballet me vonesa në pagesën e kompensimit për pushimin e lehonisë.
Milovanovik është nënë e tre fëmijëve dhe thotë se kjo situatë ia vështirëson shpesh sigurimin e nevojave bazë për djalin e saj më të vogël, Markon katërmuajsh.
“Jo të gjitha nënat mund të ushqejnë fëmijët me gji. Paketa më e lirë e qumështit formulë kushton rreth 500 denarë, pa llogaritur gjërat e tjera që janë të domosdoshme për mirëqenien e foshnjës. Nuk e kuptoj pse çdo muaj duhet të lutemi që të na paguajnë diçka që me ligj na takon”, thotë ajo.
Lidhur me vonesën, Milovanovik thotë se është drejtuar në zyrat rajonale të Fondit për Sigurim Shëndetësor në Strumicë dhe Shtip. Sipas saj, atje i kanë thënë se nga ana e saj gjithçka është në rregull, por se problemi qëndron në selinë qendrore të Fondit në Shkup, ku për shkak të pushimeve vjetore nuk ka mjaftueshëm të punësuar që t’i përpunojnë dokumentet.
Megjithatë, Fondi për Sigurim Shëndetësor mohon se ka vonesa në pagesa. Nga atje thonë se kompensimet paguhen në mënyrë të rregullt dhe të vazhdueshme.
“Pagesat realizohen në mënyrë të vazhdueshme, në përputhje me dinamikën e përfundimit të procedurave të parashikuara me ligj. Fondi mbetet plotësisht i përkushtuar ndaj trajtimit në kohë dhe me efikasitet të të gjitha kërkesave, ndërsa pagesat realizohen menjëherë pas përfundimit të procedurave të përcaktuara me ligj”, thuhet në përgjigjen e Fondit.
Nga Fondi shtojnë se vetëm gjatë muajit maj 2026, për kompensimin e pagës gjatë pushimit të lehonisë, janë paguar gjithsej 308.007.565 denarë.
Megjithatë, gjendja në terren nuk përputhet me pretendimet e institucionit. Milovanovik thotë se pagesën për muajin maj e ka marrë vetëm para dy ditësh, ndërsa kompensimin për muajin qershor ende është duke e pritur.
Se ky nuk është një rast i izoluar, e konfirmojnë edhe mesazhet e shumta nga nënat që prej muajsh po përballen me vonesa në pagesën e kompensimit të lehonisë.
“Nuk mund t’u themi fëmijëve: ‘Prisni, sepse shteti nuk ka para të na paguajë një të drejtë që na takon me ligj.’ Ata kanë nevojë për qumësht, pelena dhe kujdes të përditshëm”, shkroi një nënë që kërkoi të mbetet anonime.
Përveç nënave në pushim të lehonisë, me vonesa në pagesa po përballen edhe gratë që marrin kompensim për shtatzëni me rrezik. Nënat që ndajnë përvojat e tyre në një grup në Facebook thonë se pagesën e fundit për shtatzëninë me rrezik e kanë marrë për muajin prill.
Vonesa të ngjashme ka pasur edhe në të kaluarën, por atëherë Fondi përgjegjësinë ua atribuonte punëdhënësve, me arsyetimin se ata nuk i paguanin pagat në kohë.
