Tetë persona, mes tyre edhe drejtues të lartë në Drejtoria e të Ardhurave Publike (DAP), janë dërguar sot në paraburgim 30-ditor pas aksionit të gjerë të Prokuroria për Ndjekjen e Krimit të Organizuar dhe Korrupsionit.
Vendimi është marrë nga Gjykata Penale, e cila ka pranuar kërkesën e prokurorisë, duke vlerësuar se ekziston rrezik nga arratisja dhe ndikimi mbi dëshmitarët gjatë procedurës hetimore.
Sipas dyshimeve fillestare, bëhet fjalë për një skemë të mirëorganizuar të evazionit fiskal dhe pastrimit të parave, përmes së cilës buxheti i shtetit është dëmtuar për rreth 5 milionë euro. Grupi kriminal dyshohet se është udhëhequr nga një shtetas i Serbisë, i cili, në bashkëpunim me dy të punësuar në Drejtorinë Rajonale Shkup të DAP-it dhe persona të tjerë, ka ndërtuar një rrjet të kompanive fiktive dhe transaksioneve të rreme.
Burime nga hetimi bëjnë të ditur se përmes dokumentacionit të falsifikuar, faturave fiktive dhe keqpërdorimit të procedurave tatimore, janë shmangur detyrime të konsiderueshme ndaj shtetit. Mjetet financiare më pas janë “pastruar” përmes llogarive bankare dhe firmave të ndryshme.
Gjatë kontrolleve të realizuara një ditë më parë në 16 lokacione në Shkup dhe qytete të tjera, autoritetet kanë sekuestruar dokumente fiktive, vula të rreme, pajisje elektronike, para të gatshme, si dhe armë, të cilat pritet të jenë pjesë e provave në procedurën penale.
Nga prokuroria njoftojnë se hetimi vazhdon dhe nuk përjashtohet mundësia që në këtë rast të përfshihen edhe persona të tjerë, ndërsa priten edhe akuza shtesë për vepra të rënda penale që lidhen me krimin e organizuar, korrupsionin dhe keqpërdorimin e pozitës zyrtare.
