Ministria për Punë të Brendshme ka ngritur kallëzim penal ndaj gjyqtarit të Gjykatës së Apelit në Shkup, Gjoko Ristov, nën dyshimet për përfitim dhe fshehje të paligjshme të pasurisë, si dhe për pastrim parash.
Sipas policisë, Ristov, që nga viti 2020 e deri më sot, ka dhënë të dhëna të rreme për pasurinë e tij dhe të familjes, pasuri që dyshohet se i tejkalon dukshëm të ardhurat e tij ligjore.
Kallëzimi penal është ngritur pas hetimeve të zhvilluara nga Njësia kundër korrupsionit. Si pjesë e rastit, më herët ishte realizuar bastisje në shtëpinë e prindërve të tij, ku u sekuestruan 350 mijë euro, fakt që ishte bërë publik paraprakisht.
Ndërkohë, Prokuroria Publike ka kërkuar masën e arrestit shtëpiak për gjyqtarin e Apelit Gjoko Ristov, pasi Këshilli Gjyqësor ia hoqi imunitetin, duke hapur rrugën për procedurë penale.
Rasti lidhet edhe me hetimin ndaj ish-avokatit të shtetit Fehmi Stafa, i cili ndodhet në paraburgim dhe dyshohet se ka marrë 50 mijë euro ryshfet për të ndikuar te një gjyqtar i Apelit në Shkup në një çështje gjyqësore.
Partitë politike kanë reaguar pas ngritjes së kallëzimit penal, duke e cilësuar rastin si dëshmi serioze të gjendjes alarmante në sistemin gjyqësor. Opozita kërkon përgjegjësi penale dhe pastrim të plotë të gjyqësorit, ndërsa partitë në pushtet thonë se procesi duhet të zhvillohet pa presione dhe ndikime politike.
