Премиерот на Косово, Албин Курти, му честита на Коалицијата ВЛЕН за убедливата победа на локалните избори во Северна Македонија, оценувајќи дека резултатот претставува доказ за чесно владеење и довербата на граѓаните во промената.
Во јавна објава, Курти лично им честита на двајцата лидери на коалицијата, Изет Меџити и Билал Касами, за победите во Чаир и Тетово – двете најважни албански општини во земјата.
„Од Чаир до Тетово, ВЛЕН успеа да победи во десет општини во Северна Македонија. Двајцата мои пријатели, Изети и Билали, заслужено триумфираа затоа што работеа со конкретни проекти и чесна работа. Првиот уште во првиот круг, вториот две недели подоцна, но двајцата победија со голема разлика,“ напиша Курти.
Косовскиот премиер нагласи дека оваа победа ја одразува новата парадигма на владеење — без корупција, без скандали и со посветеност на јавниот интерес. Според него, ВЛЕН успеал да го зачува интегритетот и довербата преку политички стил кој јасно се разликува од претходните влади.
„Во првите 15 месеци на власт, ВЛЕН владееше со чисти раце, правејќи етичка разлика во однос на претходните влади,“ истакна Курти.
Тој додаде дека новиот политички дух што го претставува ВЛЕН позитивно влијаел и на односите меѓу Косово и Северна Македонија, кои, според него, „се посилни од кога било досега“.
„Од содржајниот состанок на двете влади до заедничкото управување со границата, Косово и Северна Македонија како никогаш досега ги продлабочија соседските односи,“ напиша Курти.
