Болестите на крвотокот, особено хипертензијата, стануваат сериозен здравствен проблем за албанското население. Најновиот извештај на Светската здравствена организација (СЗО) покажува дека 47% од популацијата на возраст 30–79 години страда од висок крвен притисок – многу повеќе од светскиот просек од 34%.
Од над 797 илјади засегнати лица, само половина се дијагностицирани, помалку од 40% се лекуваат, а едвај 11% ја држат состојбата под контрола. Со тоа, Албанија се вбројува меѓу земјите со најниска стапка на контрола во регионот, далеку од глобалната цел од 50%.
Последиците се драматични: во 2022 година, кардиоваскуларните заболувања сочинувале речиси половина од сите смртни случаи во земјата, додека 59 случаи на 100 илјади жители директно се поврзуваат со висок крвен притисок.
Главен фактор на ризик, според СЗО, е високата консумација на сол. Албанците просечно внесуваат 13 грама сол дневно – повеќе од двојно над препорачаното ниво од 5 грама. Дополнително, 26% од возрасните се активни пушачи, а алкохолот и физичката неактивност ја влошуваат состојбата, зголемувајќи го ризикот од инфаркт и мозочен удар.
Иако Албанија има усвоено национална стратегија за спречување на овие заболувања, практичната примена останува слаба. СЗО предупредува дека е неопходно зајакнување на примарната здравствена заштита, поголеми кампањи за подигање на свеста и подобар пристап до ефикасен третман, за товарот од хипертензијата да не прерасне во неконтролирана здравствена криза.
