Студентите сместени во студентскиот дом „Пелагонија“ во Скопје утрово останаа без струја, поради долг од над седум милиони денари.
Од Министерството за образование и наука информираат дека студентските домови имаат големи долгови, поради што вакви ситуации се случуваат често.
Ова не е прв проблем со условите во домот. Во ноември минатата година, студентите реагираа на појава на глувци, а од управата следеше ироничен одговор: „Од глувци ли се плашите“.
Студентите кои престојуваат во државните студентски домови низ земјата со години укажуваат на нехумани услови за живот. Тие се жалат на чести прекини на топла вода и електрична енергија, како и на неквалитетна исхрана.
Во меѓувреме, во тек е реконструкција на студентските домови „Стив Наумов“ и „Кузман Јосифовски-Питу“ во Скопје. Според најавите, тие треба да бидат повторно отворени за студентите од академската 2026/2027 година.