Поради прекршување на изборниот молк во првиот круг од Локалните избори 2025 и врз основа на извештаите од мониторингот на медиумското покривање на изборниот процес, Советот на Агенцијата на денешната 15. седница донесе одлука да покрене прекршочна постапка против „ТВ 24 Вести“ и „ТВ Вистел“.
„На 19 октомври, за време на вториот ден од изборниот молк, двете телевизии емитуваа изјави на министерот за внатрешни работи Панче Тошковски, кој врши функција во државен орган,“ соопштија од Агенцијата.
Според наводите, „ТВ Вистел“ двапати емитувала прес-конференција на министерот Тошковски, додека „ТВ 24 Вести“ ја пренела неговата изјава во вестите во 10:00 часот.
Од Агенцијата потсетуваат дека за време на изборниот молк е забрането пренесување на изјави, активности или настапи на носители на јавни функции кои можат да влијаат врз избирачите.