По објавата на PortalX за инцидентот во Клиниката за кардиологија во Скопје, Петар Богојески излезе со јавен демант, во кој ги негира наводите и најавува правни постапки.
Во својата реакција, тој наведува дека „најостро, целосно и недвосмислено ги демантирам изнесените наводи како невистинити, тенденциозни и злонамерни“, додавајќи дека веќе се започнати повеќе постапки.
Тој потврдува дека е покрената и граѓанска постапка, наведувајќи: „граѓанска постапка за клевета и навреда против лицето Фуркан Салиу“.
Во истото соопштение, Богојески информира и за поднесена претставка до Советот за етика во медиумите, како и за кривични пријави и дисциплински постапки против медицински персонал во Клиниката за кардиологија, за повеќе наводни пропусти поврзани со третман на пациент.
Тој дополнително наведува дека здравствената состојба на неговата мајка се влошила и дека таа е хоспитализирана во друга здравствена установа.
Богојески ги повикува медиумите да го објават демантот и да се воздржат од, како што наведува, ширење на „невистинити и штетни тврдења“.
PortalX, пред објавувањето на текстот, се обидел да добие став од Богојески, но тој не одговорил на барањето на редакцијата.