Shqipëria ka hapur zyrtarisht klasterin e fundit të negociatave për anëtarësim në Bashkimin Evropian, një moment historik që u shënua me festë në Bruksel. Kryeministri Edi Rama, së bashku me delegacionin shqiptar, priti hapjen e Klasterit 5 — “Burimet, bujqësia dhe kohezioni” — me një tortë simbolike dhe muzikën “It’s gonna be a good life”, duke e kthyer ceremoninë në një festim optimist të progresit drejt BE-së.
Hapja e klasterit final vjen më pak se një vit e gjysmë pasi Shqipëria nisi ciklin e ri negociues, duke arritur të hapë të gjashtë klasterët me një ritëm që zyrtarët evropianë e vlerësuan si “rekord”.
Komisionerja e BE-së për Zgjerimin, Marta Kos, tha se momenti është i rëndësishëm jo vetëm për Tiranën, por edhe për Brukselin.
“Kjo arritje nuk do të ishte e mundur pa përkushtimin e fortë politik të Shqipërisë dhe pa angazhimin e vendeve anëtare të BE-së për të mbështetur përparimin e saj… Shqipëria është shembulli më i mirë i fuqisë transformuese të procesit të zgjerimit”, tha Kos, duke theksuar rolin e qytetarëve shqiptarë në kërkesën për ndryshim.
Rama e cilësoi ditën si një sukses që para pak kohësh dukej i pamundur.
“Kush do ta mendonte se sot do të ishim këtu, duke hapur të gjithë klasterët. Dikur kjo dukej e pamundur dhe ne ishim mësuar me refuzime. Na godisnin drejtpërdrejt në stomak… Ja ku jemi sot — përballë diçkaje që më shumë se një vit më parë ishte vetëm një ëndërr”, deklaroi ai.
Tashmë Shqipëria synon mbylljen teknike të negociatave deri në vitin 2027, ndërsa objektivi final mbetet anëtarësimi i plotë në Bashkimin Evropian deri në vitin 2030.
Shqipëria mori statusin e vendit kandidat në vitin 2014, ndërsa Maqedonia e Veriut — e cila këtë vit shënon 25 vite pritjeje — mbetet ende e bllokuar në rrugëtimin e saj drejt BE-së.
