Sllovakia është një nga mbështetësit tanë më të besueshëm dhe më të përkushtuar afatgjatë për integrimin evropian, me një angazhim kristalisht të qartë për nevojën e zgjerimit të BE-së. Ajo nuk e bën këtë vetëm në kuadër të Grupit të Vishegradit, por edhe me pjesëmarrjen aktive në grupin “Miqtë e Ballkanit Perëndimor” dhe me takimin e sotëm, theksoi sot presidentja Gordana Siljanovska-Davkova në konferencën e përbashkët për shtyp me homologun e saj sllovak, Peter Pellegrini.
Të dy ndajnë qëndrimin se zgjerimi duhet të bazohet në kriteret e Kopenhagës, nga të cilat, siç tha ajo, nuk duhet të shmangemi. – Do të thotë të bazohet në merita dhe rezultate, dhe të mos varet nga kushte shtesë politike joracionale që në një mënyrë apo tjetër uzurpojnë procesin e integrimit evropian, tha Siljanovska-Davkova.
Presidentja Siljanovska-Davkova tha se politika jonë e jashtme dhe e sigurisë, dhe këtë siç theksoi ajo, e dinë të gjitha shtetet anëtare të BE-së dhe të gjitha institucionet dhe funksionarët e tyre në BE, është plotësisht e harmonizuar me atë të BE-së.
– Ne vazhdojmë të kontribuojmë në mënyrë aktive për sigurinë kolektive dhe rajonale, sepse ajo siguri është edhe siguria jonë, potencoi presidentja. Ajo theksoi se është e nevojshme një bashkëpunim më i madh, besim i ndërsjellë, solidaritet, jo vetëm në BE dhe NATO, por edhe në kuadër të Kombeve të Bashkuara.
Takimi i sotëm, siç tha ajo, është një dëshmi se ekzistojnë marrëdhënie të shkëlqyera bilaterale mes Maqedonisë dhe Sllovakisë, si shprehje e vullnetit dhe vendosmërisë së përbashkët për thellim të mëtejmë në të ardhmen.
– Marrëdhëniet politike ishin dhe edhe sot i vlerësuam si jashtëzakonisht të mira. Dëshiroj një bashkëpunim më të mirë ekonomik, por për këtë qëllim përshëndes nënshkrimin e Memorandumit për bashkëpunim ekonomik dhe pres që ai të hapë mundësi të reja për projekte, investime dhe partneritete biznesi, tha Siljanovska-Davkova.
– Me Sllovakinë na lidh trashëgimia e përbashkët e vëllezërve të shenjtë Kirili dhe Metodi, marrëdhënie të ngushta kulturore, miqësi gjithëpërfshirëse dhe afatgjatë, potencoi presidentja.
Ajo theksoi se beson në diplomacinë kulturore dhe shtoi se e vlerëson interesimin e opinionit akademik sllovak për gjuhën dhe kulturën maqedonase.
– Kjo është shprehur qartë me botimin e librit të parë mësimor për gjuhën maqedonase për sllovakët dhe me rikthimin e mësimit të gjuhës maqedonase në Universitetin “Konstantin Filozofi” në Nitra, ku gjithashtu sot funksionon me sukses Lektorati për gjuhën maqedonase. Kjo është për një respekt të madh, theksoi Siljanovska-Davkova. Ajo kujtoi se këtë verë, si mbrojtëse e SVP-së, është takuar me poetin sllovak Ivan Shtrpka, fitues i “Kurorës së Artë” për këtë vit.
