Pas vitesh keqtrajtimi dhe poshtërimi, një incident e hapi rrëfimin për dhunën mes bashkëmoshatarëve që, sipas burimeve, për një kohë të gjatë kishte mbetur e pandëshkuar.
Kushdo që e sheh për herë të parë këtë video, do të thoshte: Çfarë mendon të bëjë ky djalë me atë thikë?
Por çka nëse ai ka qenë në vetëmbrojtje dhe më parë ka qenë viktimë e torturës fizike dhe psikike nga një bashkëmoshatar i tij?
Sa kohë ke duruar torturë nga ky djalë?
Dy vjet.
Dhe si dukej kjo?
Unë rri në dhomë, ai vjen, më shqetëson, më godet, ma tregon organin gjenital.
Më keqtrajton, nuk më lë të jem i qetë.
Ka ndodhur shumë herë. Shpesh më ka goditur me shuplaka, me shqelma.
Jo vetëm mua, është edhe një fëmijë tjetër të cilit ia bëjnë të njëjtën gjë. E shohin që ne jemi më të dobët se ata, pastaj vijnë më shumë persona dhe na sulmojnë, përshkruan djali i sulmuar.
Ngjarja ka ndodhur në konviktin e nxënësve “Llazar Llazarovski” në Veles.
Ky rast ishte vetëm shkas që ekipi ynë të hulumtojë më thellë, ndërsa informacionet që siguruam janë shqetësuese.
Personi që shihet duke e sulmuar bashkëbiseduesin tonë është djali i një ish-këshilltareje komunale nga radhët e LSDM-së. Sipas burimeve tona, ai vazhdimisht ka kaluar pa u ndëshkuar.
Ai, bashkë me edhe disa shokë të tjerë, dyshohet se kanë organizuar duele boksi. Ndërsa ata që i zgjidhnin, nëse nuk pranonin të rriheshin mes vete, më pas rriheshin nga i njëjti grup.
Rasti i fundit ka ndodhur më 25 mars të këtij viti. Në polici është paraqitur vetëm pasi ne filluam të parashtrojmë pyetje.
“Kjo ndodhi te ne në dhomë, më 25.03.2026 në ora 21:40. Ai erdhi që të rriheshim, të bënim sparing. Unë i thashë se nuk dua, por ai më detyronte me forcë.
Ai më goditi në fytyrë. Unë refuzoja dhe i thashë të mos më godiste më, por ai vazhdoi.
U nervozova, e hoqa dorezën, e mora thikën dhe ia afrova te fytyra”, përshkruan djali.
Drejtori i konviktit, Aleksandar Karakaçanov, deklaroi se në këtë moment nuk dëshiron të japë deklaratë, me qëllim që të mos ndikojë në hetimin që po zhvillohet. Por mbetet e paqartë pse ky rast është paraqitur në polici 13 ditë më vonë.
Edhe policia e konfirmoi rastin dhe shkurt na njoftoi se po punohet për zbardhjen e tij.
Në fund, djali i mori batanijet dhe rrobat e tij dhe e braktisi konviktin, i vetëdijshëm për atë që kishte bërë, por duke pretenduar se nuk kishte zgjidhje tjetër.
“E kuptoj se ajo që bëra, që e mora thikën, nuk është gjë e mirë. Është gabimi im i rëndë dhe mund të përfundoj në burg për këtë.
Pse e bëre këtë?
Në vetëmbrojtje e bëra.
Nuk mund të duroje më?
Jo, nuk mund të duroja më, sepse u bë e padurueshme dhe më duhej ta bëja këtë që të më hiqej qafe”, përfundon rrëfimin.
Nëse masat do të ishin ndërmarrë me kohë, a do të ndodhte kjo?
Nëse të gjithë fëmijët janë të barabartë para rendit dhe ligjit, a do të ndodhte kjo?
