Maqedonia e Veriut sot përkujton një vit nga një prej tragjedive më të mëdha në historinë e saj moderne – zjarrin në diskotekën “Puls” në Koçan, ku humbën jetën 63 të rinj dhe fëmijë, ndërsa 193 persona u plagosën, shumë prej të cilëve edhe sot vazhdojnë të përballen me pasojat e rënda të plagëve dhe traumave. Tragjedia ndodhi në natën mes 15 dhe 16 marsit 2025, kur një zjarr i fuqishëm përfshiu objektin gjatë një eventi me shumë të rinj.
Edhe një vit pas kësaj fatkeqësie, dhimbja në Koçan dhe në gjithë vendin mbetet e thellë. Në Gjykatë është në proces një procedurë gjyqësore kundër 35 personave, të cilët akuzohen për përgjegjësi të ndryshme lidhur me sigurinë e objektit, organizimin e ngjarjes dhe mbikëqyrjen institucionale. Tragjedia hapi një debat të gjerë publik për dështimet institucionale, kontrollin e objekteve publike dhe respektimin e standardeve të sigurisë, ndërsa familjarët e viktimave gjatë gjithë vitit kanë kërkuar drejtësi dhe përgjegjësi për atë që ndodhi.
Në Koçan është organizuar një program përkujtimor treditor nga 14 deri më 16 mars, me një sërë aktivitetesh për të nderuar viktimat e tragjedisë. Sot në kishën “Shën Gjergji” u mbajt liturgji për të ndjerët, ndërsa në orën 09:30 u zhvillua edhe parastosi i përgjithshëm për viktimat e zjarrit në diskotekën “Puls”. Shërbimet fetare u drejtuan nga kryepeshkopi i Ohrit dhe Maqedonisë, Stefan, së bashku me mitropolitin e Bregallnicës, Ilarion.
Gjatë tre ditëve të përkujtimit në qytet janë planifikuar edhe aktivitete të tjera memoriale, përfshirë marsh përkujtimor dhe ndezje qirinjsh në qendër të Koçanit, vendosje lulesh dhe homazhe në vendin ku ndodhej diskoteka “Puls”, si dhe aktivitete përkujtimore me pjesëmarrjen e familjarëve, qytetarëve dhe organizatave civile. Në natën mes 15 dhe 16 marsit, në kohën kur ndodhi tragjedia, është paraparë edhe moment heshtjeje në kujtim të viktimave.
Familjarët e viktimave gjatë vitit të kaluar organizuan edhe disa protesta dhe tubime publike, duke kërkuar që të zbardhen plotësisht rrethanat e zjarrit dhe të ndëshkohen të gjithë përgjegjësit. Tragjedia e Koçanit ka nxitur diskutime të gjera në opinion për sigurinë në objektet e natës, kontrollin e licencave dhe përgjegjësinë e institucioneve për parandalimin e tragjedive të tilla.
Pas zjarrit tragjik, Maqedonia e Veriut u përball edhe me një valë të madhe solidariteti ndërkombëtar. Dhjetëra shtete evropiane dhe të rajonit ofruan ndihmë mjekësore, ndërsa një pjesë e të plagosurve me djegie të rënda u transportuan për trajtim në klinika të specializuara jashtë vendit. Mjekët dhe ekipet e emergjencës u përballën me një nga operacionet më të mëdha mjekësore të viteve të fundit për trajtimin e pacientëve me djegie të rënda.
Në përvjetorin e tragjedisë, Qeveria organizon në Shkup edhe një konferencë ndërkombëtare kushtuar reagimit institucional dhe mjekësor pas zjarrit në Koçan. Në konferencë marrin pjesë përfaqësues të institucioneve shtetërore, ekspertë ndërkombëtarë dhe profesionistë të shëndetësisë nga rajoni dhe Evropa. Ngjarja u hap me fjalimet e kryeministrit Hristijan Mickoski, ministrit të Shëndetësisë Azir Aliu dhe ministrit të Punëve të Jashtme Timço Mucunski, ndërsa në kuadër të saj diskutohen përvojat nga reagimi ndërkombëtar, trajtimi i djegieve dhe nevoja për përmirësimin e sistemeve të reagimit në raste emergjente.
Një vit pas zjarrit në diskotekën “Puls”, tragjedia e Koçanit mbetet një nga plagët më të rënda shoqërore në vend. Për familjet e viktimave dhe qytetin e Koçanit, përvjetori i parë është një kujtesë e dhimbshme për 63 jetë të reja të humbura, por edhe një thirrje që drejtësia të vihet në vend dhe që një tragjedi e tillë të mos përsëritet më.
