Кандидатот за градоначалник на општина Брвеница, Хаќим Рамадани, побара итна средба со меѓународните претставници во врска со изборниот процес во оваа општина.
Според Рамадани, во текот на изборниот процес во Брвеница имало бројни неправилности.
„Повик за итна средба со меѓународните претставници во врска со изборниот процес во општина Брвеница
Почитувани претставници на ОБСЕ, ОДИХР, Амбасадата на Соединетите Американски Држави, НДИ и сите меѓународни организации кои ги следат и поддржуваат изборните процеси,
Во моето својство како кандидат за градоначалник на општина Брвеница, барам итна средба со вашите претставници за да ги дискутираме случувањата и неправилностите кои се случија за време на изборниот процес во нашата општина.
Од суштинско значење е секој глас на граѓаните на Брвеница да биде почитуван и изборниот процес да биде правичен, транспарентен и во согласност со меѓународните демократски стандарди.
Овој повик се прави во духот на транспарентност, правичност и почитување на граѓанската волја,“ напиша Рамадани.
