Американскиот претседател Доналд Трамп и кинескиот претседател Си Џинпинг се договорија да го запрат понатамошното ескалирање на трговската војна меѓу двете земји, постигнувајќи едногодишно примирје за време на нивната средба во Бусан, Јужна Кореја, во рамките на самитот на АПЕК. Ова е прва средба меѓу двајцата лидери од 2019 година.
Според договорот, Кина ќе го одложи воведувањето на извозните контроли за ретките минерали, додека САД ќе се откажат од планот за воведување царина од 100 проценти на кинеските производи. Трамп исто така најави дека ќе ја намали царината поврзана со фентанил од 20 на 10 проценти, откако Си се обврза дека ќе „работи напорно“ за да го намали протокот на овој синтетички опиоид кон САД.
Трамп ја опиша двочасовната средба со Си како „неверојатна“ и истакна дека прашањето за ретките минерали е „решено“, додавајќи дека договорот ќе се преговара повторно секоја година. Си, од своја страна, изјави дека двете страни постигнале „консензус за решавање на проблемите“ и треба да преземат „конкретни чекори за да се обезбеди стабилност на глобалната економија“.
Кинеското Министерство за трговија го потврди едногодишното одложување на извозните контроли и најави дека САД ќе ги суспендираат плановите за проширување на технолошките ограничувања кон кинеските подружници, додека двете земји ќе ги запрат реципрочните пристанишни такси. Сепак, најголемиот дел од постојните трговски бариери остануваат, а експертите го оценуваат договорот како „делумно замрзнување“ на трговската војна.
Економистите оценуваат дека договорот привремено ќе ги стабилизира односите меѓу САД и Кина и ќе го намали ризикот за глобалната економија, но предупредуваат дека многу клучни прашања – како технологијата и синџирите на снабдување – сè уште остануваат нерешени.
