Судењето за трагедијата во дискотеката „Пулс“ во Кочани ќе започне на 19 ноември 2025 година, во која загинаа 63 лица, а повеќе од 200 млади беа повредени.
„Главната расправа за кривичниот предмет со ознака К.бр. 1872/25, поврзан со несреќата во дискотеката ‘Пулс’ во Кочани, е закажана за 19 ноември 2025 година, со почеток во 09:30 часот, во судницата во Казнено-поправната установа Идризово“, соопштија од Кривичниот суд.
Како што беше претходно објавено, обвинението кое првично го поднесе Јавното обвинителство во Кочани, а потоа со одлука на Јавниот обвинител на Република Северна Македонија беше пренесено во надлежност на Јавното обвинителство во Скопје, е целосно потврдено. Според системот АКМИС, предметот е распределен на постапување кај судијката Дијана Груевска Илиевска.
„Поради интересот на медиумите и невладините организации кои ја следат работата на судот, како и заради транспарентно информирање на јавноста за овој случај, информираме дека освен судиите кои беа изземени од постапките пред оценката на обвинението, судијките Тамара Витларова-Смилевска и Илина Смичковска-Илиевска беа изземени од натамошното постапување во предметот, поради исполнување на законските одредби – односно лична познаност со некои од оштетените лица“, наведуваат од судот.
Во судскиот совет ќе членува и судијата Ахмед Идризи, кој ќе биде втор член на советот што ќе постапува по предметот, согласно измените во годишниот распоред за работа на судиите, додаваат од Кривичниот суд.
