Ќе се блокира сообраќајот во Кочани, родителите на жртвите од „Пулс“ бараат правда за своите деца
„Почнувајќи од денес, ќе има мирни јавни собири и блокади на кружниот тек кај двојниот мост на улицата ‘Стево Теодосиевски’. Блокадите ќе траат по еден час секој ден, од 15:15 до 16:15 часот, сè до почетокот на судењето,“ соопштија родителите на жртвите од пожарот во клубот „Пулс“ на 16 март, за време на „26. Марш за ангелите“, одржан вчера пред Основниот суд во Кочани.
Родителите изјавија дека, според нив, адвокатите на осомничените рекле дека судскиот процес може да трае од 10 до 15 години.
„Таквата изјава е срамна и понижувачка за семејствата чии деца ги загубија животите во трагедијата. Таквите зборови звучат како обид за подготвување на јавноста за бавно и бесконечно одолговлекување. Ние нема да го дозволиме тоа,“ изјави мајката на едно од жртвите.
Родителите на жртвите бараат судот да го зголеми својот капацитет со дополнителни судии и судски асистенти, за процесот да не се одложува поради недостиг на ресурси.
Тие истакнаа дека судските рочишта треба да добијат приоритет и да се одвиваат со континуиран ритам, за постапката да се спроведе без непотребни одложувања.
Родителите исто така изразија сомнеж за можни манипулации или тајно забавување на процесот и побараа јавен и транспарентен надзор над сите судски активности.
