Во Копенхаген денеска се одржува самит на лидерите од 47 европски земји, на кој во фокусот се поддршката за Украина и зајакнувањето на безбедноста на континентот. На маса ќе бидат и теми поврзани со економската стабилност и миграцијата.
На средбата се очекува присуство на украинскиот претседател Володимир Зеленски, како и на генералниот секретар на НАТО, Марк Руте. Домаќин е данската премиерка Мете Фредериксен, а настанот, како и секогаш, ќе отвори можности и за низа билатерални разговори.
Европската политичка заедница беше формирана по руската агресија врз Украина во 2022 година, со цел да ја нагласи изолацијата на Москва. Во неа членуваат 27-те држави на Европската Унија и уште 20 партнери, меѓу кои е и Северна Македонија. Македонската претседателка Гордана Сиљановска-Давкова ќе се обрати на панел-дискусијата „Безбедност и отпорност – традиционални и нови закани“, со која ќе копретседаваат францускиот претседател Емануел Макрон и албанскиот премиер Еди Рама.
