Претседателот на Собранието на Северна Македонија, Африм Гаши, му честиташе на својот албански колега, Нико Пелеши, за неговиот избор.
„Во име на Собранието на Република Северна Македонија и во мое лично име, упатувам искрени честитки за изборот на Нико Пелеши за претседател на Собранието на Република Албанија. Убеден сум дека за време на мандатот на г. Пелеши, одличните пријателски и братски односи меѓу нашите земји, изградени врз заемна почит и соработка, ќе се продлабочат уште повеќе“, напиша Гаши во објава на Фејсбук, пренесоа медиумите.
Тој додаде дека со нетрпение очекува зајакнување на меѓупарламентарната соработка и заедничката работа за унапредување на заедничките аспирации за европска интеграција, регионална стабилност и демократски развој.
„Ви посакувам успех во извршувањето на вашата значајна должност и ја изразувам мојата подготвеност за поттикнување на блиско партнерство меѓу нашите два парламента“, порача Гаши.
Нико Пелеши, од Социјалистичката партија, беше избран вчера доцна попладне за прв парламентарец на новиот албански состав, кој произлезе од изборите одржани на 11 мај.
