Независниот синдикат на полицијата во Северна Македонија го крена гласот против, како што велат, системската дискриминација и неможноста за напредување во кариерата на албанските полицајци.
Преку изјава од заменик-генералниот секретар Флорим Алими, се истакнува дека значителен број полицајци, и покрај долгогодишното професионално искуство и потребните квалификации, не успеале да напредуваат на службените позиции. Ги загрижува фактот дека во населби со мнозинско албанско население, бројот на полицајци и раководни кадри е еднаков помеѓу Албанци и Македонци, додека во места каде што Албанците се малцинство, тие воопшто не се земаат предвид за високи позиции, за разлика од Македонците кои се поставуваат на повисоки функции во албанските средини.
„Напредувањето на албанскиот кадар не е доволно. Особено ова е изразено кај менаџерскиот кадар и на повисоките раководни нивоа. Најмногу дискриминација е забележана во Битола и неколку градови каде Албанците се помалку бројни, како Охрид и Прилеп, каде што ситуацијата е многу лоша,“ изјави Флорим Алими, заменик-генерален секретар на организацијата за ПорталX.
„Во раководниот кадар недостасува бројка според населението. На пример, во Тетово, Гостивар, Кичево, Струга – според посетите што ги правиме и локалниот процент на население – менаџментот требаше да биде во однос 80/20. Но, во најголем дел од случаите имаме однос 1/1, односно двајца албански и двајца македонски сменски шефови. А за повисоките позиции и да не зборуваме. Сигурно има некаква намера, затоа побарав и официјална средба со заменик-министерот Исени, висок функционер, за да се разгледа оваа загриженост на албанскиот кадар,“ изјави Алими.
Алими потенцира дека овој проблем не влијае негативно само врз моралот и мотивацијата на вработените, туку исто така создава јасно чувство на дискриминација и нееднаквост во системот. Како пример го посочува и својот случај: со над 23 години работно искуство и сите потребни квалификации, сè уште нема можност за унапредување.
Синдикатот ја нагласува својата заложба за правично претставување на сите полициски службеници и бара од надлежните органи да преземат конкретни мерки за обезбедување еднаков третман за секој вработен, во согласност со неговото искуство, посветеност и професионален придонес.
