Генералниот секретар на Европската федерација на новинари – ЕФЈ, Рикардо Гутиерез, реагираше крајно загрижен поради континуираните напади врз новинарот и основач на PortaliX, Фуркан Салиу. Гутиерез во својата реакција вели дека однесувањето на МВР кон Салиу повеќе не се толерира.
„Тој беше произволно уапсен пред неколку дена откако се обиде да го документира полициското насилство по фудбалски натпревар… За време на неговиот притвор, провладините медиуми и пропагандните профили на социјалните мрежи брзо се обидоа, но не успеаја, да создадат лажни наративи за причините за неговото притворање, вклучително и неосновани наводи дека нападнал полицајци. Покрај тоа, некои владини министри се обидоа да го нарушат угледот на Салиу“, пишува Гутиерез.
По информациите дека Салиу е кривично обвинет од МВР, Гутиерез го повика министерот Панче Тошковски да ја почитува независноста на медиумите и да внимава во случаите со новинари.
„Го повикувам министерот за внатрешни работи, Панче Тошковски, прецизно да се погрижи случаите во кои се вклучени новинари да се постапуваат во целосна согласност со европските правни стандарди и дека секоја истрага во која се вклучени новинари ја зема предвид потребата да се почитува независноста на медиумите, нивната улога во општеството и особено заштитата на новинарските извори“, вели Гутиерез.
Првиот човек на Европската федерација на новинари нагласи дека евидентирањето на полициското насилство и информирањето на јавноста за тоа не е кривично дело. Сторителите на ова насилство треба да бидат кривично гонети, а не новинарите кои известуваат за тоа, во интерес на јавноста, вели тој.
„Фуркан Салиу ја има целосната поддршка од Европската федерација на новинари – ЕФЈ. Заедно со нашите соработници ЗНМ и ССНМ и меѓународните невладини организации за слобода на печатот, внимателно ќе го следиме неговиот случај. Нема да оставиме без да осудиме какви било грешки на властите на Платформата на Советот на Европа за промовирање на заштитата на новинарството и безбедноста на новинарите и на платформата Мапирање на слободата на медиумите. Фуркан Салиу само си ја изврши должноста. Властите треба да му се заблагодарат наместо да го малтретираат“, пишува Гутиерез.
