Presidenti Volodymyr Zelensky paralajmëroi se çdo dorëzim i territoreve ukrainase do t’i mundësonte Vladimir Putin të përdorte vendin si bazë për sulme të ardhshme ndaj Evropës, nëse kontinenti nuk qëndron i fortë.
Në një intervistë për revistën franceze Le Point, Zelensky theksoi se një tërheqje nga Donbasi do ta ekspozonte qytetin Kharkiv, dhe mund t’i lejonte Rusisë të pushtonte qendrën industriale të Dnipros. Ai shtoi se mbijetesa e Ukrainës do të përcaktojë kufirin lindor të Evropës, duke paralajmëruar se “nëse Ukraina nuk reziston, kufiri do të jetë Polonia ose edhe Gjermania”.
Presidenti ukrainas gjithashtu paralajmëroi për armët e reja me rreze të gjatë veprimi, duke thënë se distanca nuk do të mbrojë askënd në të ardhmen: “Brenda dy vitesh rusët do të kenë raketa me rreze veprimi prej 5,000 km – dhe ne gjithashtu do të kemi.”
Komentet e tij erdhën pas deklaratave të Sergey Lavrov, i cili kërkoi njohjen ndërkombëtare të territoreve të pushtuara nga Rusia, duke përfshirë Donetsk, Lugansk, Kherson, Zaporizhzhia dhe Krimenë. Ministri ukrainas i Jashtëm, Andriy Sybiha, e quajti këtë politikë “ultimatum të vjetër” dhe kërkoi sanksione më të ashpra nga Perëndimi kundër Moskës.
Ndërkohë, Vladimir Putin paralajmëroi se Rusia do të vazhdojë operacionet ushtarake nëse nuk arrihet marrëveshje paqeje, duke pretenduar përparime të forcave të tij “në të gjitha frontet” dhe dobësimin e ushtrisë ukrainase.
Zelensky, i cili ndodhet në Paris për bisedime me aleatët evropianë, tha se nuk ka parë shenja serioze nga Moska për përfundimin e luftës dhe theksoi rëndësinë e garancive të sigurisë për vendin e tij.
