Presidenti i Shteteve të Bashkuara, Donald Trump, pritet të mbajë sot një deklaratë që mund të përcaktojë rrjedhën e ardhshme të luftës në Ukrainë. Fjalimi është paralajmëruar për orën 14:00 sipas kohës së Uashingtonit (21:00 me orën e rajonit).
Ky moment është i veçantë, pasi përkon me afatin që Trump i kishte dhënë Kremlinit për të treguar gatishmëri për një marrëveshje paqeje. Deri më tani, Moska nuk ka sinjale konkrete për negociata, ndërsa presidenti ukrainas Volodymyr Zelensky konfirmoi se Rusia vazhdon të zgjedhë rrugën e luftës.
“Ukraina është gati për dialog, por e vetmja gjë që po bën Rusia është të investojë në luftë të mëtejshme. Të gjitha sinjalet tregojnë këtë,” tha Zelensky, duke theksuar se bota kërkon fundin e luftës, ndërsa Moska e zgjat qëllimisht.
Si shembull, ai përmendi vizitën e Vladimir Putinit në Kinë për samitin e Organizatës së Bashkëpunimit të Shangait, duke e cilësuar si manovër për të shmangur presionin ndërkombëtar.
Trump kishte vendosur më 21 gusht një afat dyjavor për bisedime mes Kievit dhe Moskës, duke lënë të kuptohet se në rast dështimi, SHBA mund të ndjekë “një qasje tjetër”.
