“Super-pensionisti” Peçevski rikthehet në krye të Burimeve Njerëzore, ndërsa FSSH përballet me hetime dhe skandale

Në Fondin për Sigurim Shëndetësor po ndodhin zhvillime të pazakonta – siç ka raportuar Portali X – dhe institucionin e kanë përfshirë hetime, dyshime dhe vendime të çuditshme menaxheriale. Ndërsa vazhdojnë kontrollet për keqpërdorime financiare, ushtruesi i detyrës Drejtor i Përgjithshëm, Sasho Klekovski, ka vendosur ta rikthejë nga pensioni Zoran Peçevskin dhe ta emërojë drejtor të Burimeve Njerëzore.

Peçevski – ekonomist, pensionist dhe bujk me subvencione – sipas Open Finance është punësuar që nga korriku, vetëm një muaj pasi më 17 qershor ka fituar të drejtën e pensionit.

Ligjërisht kjo është e mundur, pas ndryshimeve të majit 2025 që lejojnë punësimin paralel me marrjen e pensionit. Por dilema kryesore mbetet: pse pikërisht Peçevski?

Si drejtor i Burimeve Njerëzore, Peçevski duhet të përgatisë kontrata pune, anekse, vendime për transferime, suspendime, masa disiplinore, dokumente për pushime nga puna dhe akte tjera ligjore. Këto janë detyra që zakonisht kërkojnë përvojë juridike. Por duket se për një “super-pensionist”, kjo nuk është pengesë.

Shqetësimet më serioze lidhen me përdorimin e autoritetit. Para pensionimit, Peçevski ka punuar po në këtë institucion, ndërsa në adresën e Portali X kanë mbërritur ankesa nga punonjës aktualë që pretendojnë se ai po ushtron hakmarrje personale përmes transferimeve dhe vërejtjeve disiplinore. Ka edhe ankesa të raportuara për mobing.

Në të njëjtën kohë, më 26 nëntor, në seancën e 132-të të Qeverisë, mandatit të Klekovskit iu vazhdua afati për të tretën herë radhazi – një praktikë që ligji nuk e lejon, por gjithashtu nuk e sanksionon. Kjo dëshmon se sa lehtë mund të zgjatet pushteti administrativ, kur institucionet nuk reagojnë.

Sipas burimeve të brendshme, në fund të nëntorit Policia Financiare ka hyrë në institucion dhe ka marrë dokumente për hetime.

Portali X ka kërkuar sqarime zyrtare se çfarë konkretisht po hetohet, por përgjigjet vazhdojnë të mungojnë.

Gazetari Furkan Saliu ka tentuar disa herë të marrë deklaratë nga Klekovski – përmes telefonatave, mesazheve dhe takimeve publike – por pa sukses.

Në një ngjarje publike, Klekovski u justifikua se “nuk mund të fliste sepse ishte i dekoncentruar”. Në një institucion të përfshirë nga hetime, vendime të dyshimta dhe akuza për mobing, kjo deklaratë përshkruan më së miri gjendjen reale të FSSH-së.