Në seancën e dytë të përbërjes së re të Këshillit të Komunës së Bërvenicës, anëtarët zgjodhën Robert Milloshevskin si kryetar të Këshillit. Milloshevski, bartës i listës së VMRO-DPMNE-së – partia nga e cila vjen edhe kryetari i komunës Jovica Ilievski – mori tetë vota “pro”.
Votat u siguruan nga gjashtë këshilltarët e VMRO-DPMNE-së dhe dy këshilltarë nga koalicioni i LSDM-së. Ndërkohë, shtatë këshilltarët e tjerë – katër nga koalicioni VLEN dhe tre nga Aleanca Kombëtare për Integrim – abstenuan. Këshilli ka gjithsej 15 anëtarë.
Me zgjedhjen e kryetarit të Këshillit dhe me ndarjen e vërtetimit për kryetar komune, është plotësuar formimi i plotë i vetëqeverisjes lokale në Bërvenicë.
Pas përfundimit të raundit të dytë zgjedhor dhe mbylljes së afateve për ankesa dhe kundërshtime, Komisioni Komunal Zgjedhor i Bërvenicës i dorëzoi Jovica Ilievskit vërtetimin për kryetar komune, duke i mundësuar që ai të vazhdojë mandatin e tij të dytë.
Më 10 nëntor, Komisioni Komunal shpërndau vërtetimet për të gjithë 15 këshilltarët e zgjedhur, pas së cilës u mbajt seanca konstituive. Megjithatë, pika për zgjedhjen e kryetarit të Këshillit u shty për seancën e sotme, gjatë së cilës Milloshevski u zgjodh zyrtarisht.
