Gjykata Supreme, Këshilli Gjyqësor dhe Shoqata e Gjyqtarëve sot i janë drejtuar me një letër të hapur kryeministrit Hristijan Mickoski, duke e akuzuar se me deklaratat e tij të përditshme po ushtron presion politik dhe po e cenon direkt pavarësinë e gjyqësorit.
Në letrën e tyre, gjyqtarët citojnë disa nga pjesët më të drejtpërdrejta të reagimit:
“Prej një kohe të gjatë, komentet tuaja për gjyqtarët dhe gjyqësorin e kanë kaluar kufirin e sjelljes së mirë dhe janë shndërruar në sulme të paargumentuara dhe të përgjithshme.”
Ata theksojnë se kritika është e dobishme vetëm kur është konkrete dhe shoqërohet me propozime, ndërsa akuzojnë kryeministrin se po përdor retorikë të përgjithshme për të shmangur përgjegjësinë për mosreformat:
“Kritika është e vlefshme vetëm kur ofron vërejtje konkrete dhe propozime të qarta për zgjidhjen e problemeve. Kritika e paargumentuar tregon mungesë qëllimi për të ndërmarrë diçka, ndërsa apatia shoqërore hidhet padrejtësisht mbi gjyqtarët.”
Gjyqtarët i kujtojnë Mickoskit se edhe Komisioni Evropian në Raportin e fundit e ka theksuar ndërhyrjen politike në punën e gjyqësorit:
“Raporti i fundit i Komisionit Evropian qartë thekson se problemi më i madh në gjyqësor është mungesa e pavarësisë së gjyqtarëve, e cila është cenuar nga ndërhyrjet e vazhdueshme të pushtetit ekzekutiv dhe atij ligjvënës.”
Ata e qortojnë kryeministrin edhe për deklaratat e tij të djeshme, ku ai e lidhi gjyqësorin me borxhin publik të shtetit:
“Sistemi gjyqësor asnjëherë nuk ka krijuar borxhe. Përkundrazi, gjykatat me vite e kanë mbushur arkën e shtetit përmes tarifave dhe gjobave, ndërsa në këmbim nuk marrin asnjë investim nga Buxheti për punësime të reja, digjitalizim apo kushte dinjitoze pune.”
Në vijim të letrës, gjyqtarët theksojnë se me këtë qasje Mickoski po e cenon parimin themelor të ndarjes së pushteteve:
“Me komentet tuaja po e dëmtoni parimin demokratik të barazisë mes tre pushteteve – gjyqësor, ligjvënës dhe ekzekutiv. Gjyqësori është kategori kushtetuese dhe pavarësia e tij duhet të respektohet.”
Ndërkohë, një ditë më parë Mickoski deklaroi se “reformat në drejtësi në thelb nënkuptojnë rritje të pagave” dhe shtoi:
“E ftoj publikun të thotë hapur nëse mendon se duhet t’i dyfishojmë pagat e prokurorëve dhe gjyqtarëve.”
Letra e gjyqtarëve përbën një nga reagimet më të forta institucionale ndaj kryeministrit në vitet e fundit. Ajo sinjalizon tension të hapur mes pushtetit ekzekutiv dhe gjyqësorit – një problem që Bashkimi Evropian prej kohësh e ka identifikuar si pengesë kryesore për procesin e integrimit të vendit.
