Kandidati i AKI-t për kryetar të Çairit, Bujar Osmani ka takuar Shefin e Misionit për Vëzhgimin e Zgjedhjeve Lokale të OSBE/ODIHR.
Bujar Osmani njofton se e ka informuar për tensionet e shtuara në Çair dhe për përpjekjet për ryshfet te votuesit.
“Sot zhvillova një takim me Matteo Mecacci, Shefin e Misionit për Vëzhgimin e Zgjedhjeve Lokale të OSBE/ODIHR.
Si ish-Kryesues me OSBE-në, e vlerësoj lart punën e tyre dhe jam i bindur se edhe këtë herë do ta ndjekin procesin zgjedhor me përpikëri dhe do të evidentojnë çdo keqpërdorim të mundshëm.
E informova për tensionet e shtuara në Çair dhe praktikat e palejuara që po përdoren nga kundërshtarët, si frikësimi i votuesve, përpjekjet për ryshfet dhe keqpërdorimi i resurseve publike për fushatë partiake.
Kërkova nga ODIHR që të ketë një fokus të veçantë në Çair, pasi pushteti atje e di se do t’i humbasë zgjedhjet dhe pikërisht për këtë arsye po përdor metoda jodemokratike.
Qëllimi ynë është i qartë: zgjedhje të lira, të ndershme, demokratike dhe transparente, ku zëri i qytetarëve do të jetë i vetmi fitues”, shkruan Osmani.
