Nga viti i ardhshëm, të rinjtë që dëshirojnë të bëhen policë do të mund ta fillojnë rrugëtimin e tyre profesional që në bankat e shkollës së mesme. Pas shumë vitesh pauzë, në shtator do të hapet sërish Shkolla e Mesme Policore. Projektligji për themelimin e kësaj shkolle tashmë është dorëzuar në Kuvend.
Sipas tij, të drejtë regjistrimi do të kenë nxënësit e rregullt që kanë përfunduar vitin e dytë të shkollës së mesme në institucionet arsimore në territorin e Maqedonisë. Përveç kësaj, kandidatët duhet të përmbushin disa kritere: të jenë shtetas të Maqedonisë, të mos kenë mbushur 18 vjeç në ditën e shpalljes së konkursit, të përdorin në mënyrë aktive gjuhën maqedonase, të jenë të shëndetshëm dhe të aftë psiko-fizikisht, si dhe të kalojnë një kontroll sigurie që do të vërtetojë se nuk përbëjnë rrezik.
Mësimi do të zhvillohet në kuadër të Qendrës së Trajnimit në Idrizovë, duke filluar më 13 maj 2026. Arsimi do të zgjasë dy vite, pra vitin e tretë dhe të katërt, ndërsa programet mësimore do të përcaktohen nga ministri i Arsimit në bashkëpunim me ministrin e Punëve të Brendshme.
Kjo do të thotë se çdo nxënës që ka përfunduar vitin e parë dhe të dytë të gjimnazit apo shkollës së mesme profesionale, nëse i plotëson kushtet, mund të aplikojë dhe ta vazhdojë arsimin e tij në këtë institucion, duke hapur rrugën për një karrierë policore.PortaliX
