“Në fillim të viteve ’80, pushteti komunist filloi rrënimin e shtëpive. Deri aty arritën me rrënim dhe ndërtuan këto ndërtesa me tulla të kuqe. Sepse në vitet ’80 kishte një fazë të ashpër të presionit kundër shqiptarëve. Filloi me rrënimin e shtëpive këtu, pastaj vazhdoi me idenë e rrënimit të mureve të shtëpive, të cilat lejoheshin maksimum deri në njëqind e njëzet centimetra. Mirëpo ky proces u ndal, sepse popullata e Dijonit ndërmori një udhëtim deri në Beograd për t’u ankuar tek Kryesia e Lidhjes Komuniste të Jugosllavisë. Pas kësaj, aksioni i rrënimit u ndal”, kështu rrëfen bartësi i listës për këshilltar komunal nga radhët e VLEN në Çair, Muhamed Murtezi, para arkitetit shqiptar nga Stambolli Bajram Vardar.
Murtezi e njoftoi arkitektin me lagjen ndërsa arkitekti evidenton se çfarë mund të bëjnë për të ndryshuar gjendjen kaotike të infrastrukturës dhe vendbanimeve të dendura. Arkitekti vazhdon edhe me takimin e banorëve dhe çmalljen me vendlindjen e tij.
“Këtë mysafirin e kemi prej Turqisë, nga Stambolli e Bursa, por është shqiptar i yni që jeton dhe punon atje. Unë, përndryshe, që një javë kam hyrë pak në politikë, jam angazhuar për komunën e Çairit. Jam bartës i listës për këshilltar dhe shpresojmë me kryetarin, zotin Mexhiti, të sjellim votë të mirë për Çair dhe për Dizhon. Shpresojmë për ndryshime, bashkërisht të bëjmë diçka për Çairin”, deklaroi Murtezi.
